Leitin af ullarpeysunni

Ég er búin að prjóna núna í 3 ár og þetta er eitt skemmtilegasta áhugamál sem ég hef átt, fyrir utan pólitík auðvitað.

Ég veit ekki hvað ég er búin að prjóna margar peysur, vettlinga og húfur á allt og alla í kringum mig.
Ég elska að prjóna og gefa þeim sem mér þykir vænt um, finnst þetta vera frábær leið til að sýna öðrum hvað ég elska þá mikið. Ég gæti aldrei prjónað eftir ,,pöntun" - þetta verður að koma frá mér, frá hjartanu og þetta verður að vera gjöf.

Ég hef reynt nú í tvígang að þykja vænt um sjálfa mig og prjónað á mig peysur og ég verð að segja, þær eru báðar fínar en samt eitthvað misklukkaðar. Önnur er úr æðislegu garni sem heitir Bariloche og er algjörlega í mínum litum - jarðlitunum. Yrjótt peysa sem ég prjónaði eftir ,,Freyju" uppskriftinni hennar Ragnheiðar Eiríks, opin að framan með þremur hnappagötum.
Ég er samt ekki að fíla mig í henni....

Ég prjónaði nú síðast kaðlapeysu í fyrsta skiptið, peysa sem hægt er að finna í fyrstu Prjónaperlubókinni, úr tvöföldum plötulopa á prjóna nr 8. Létt og fín.

Hún gerir mig feita(ri) og er alltaf að detta niður axlirnar, aðeins of stór.

Mig langar í ullarpeysu en ég finn ekki munstrið, finn ekki peysuna eða litina. Ég er algjörlega hugmyndarlaus og tóm þegar kemur að sjálfri mér.

Kannski á maður ekkert að prjóna á sjálfan sig, kannski á maður bara að kaupa sér peysurnar sínar.

Hvað finnst ykkur?

Uppáhalds prjónasíðan mín

Ég er prjónaperla, ótrúlega stolt prjónaperla.

Erla vinkona mín hefur gefið út tvær prjónabækur - Prjónaperlur - prjónað frá grasrótinni sem eru æðislegar bækur sem ég er endalaust að glugga í, prjóna uppúr eða læra af. Við sem höfum verið með uppskriftir í bókunum þeirra fáum að bera titilinn ,,Prjónaperla". Ég var með ,,ástarhúfu-uppskrift" í fyrstu bókinni, sló í gegn þó ég segi sjálf frá ;)

Svo eru þær með æðislegar síðu sem er mjög virk á http://www.midjan.is/ og er linkurinn þeirra hér:
http://prjonaperlur.midjan.is/

Erla er í námi í Ástralíu þessi misserinn og því kannski ekki prjónandi mikið en Halldóra frænka hennar er óstöðvandi.

Allir prjónaunnendur þurfa að eiga þessar bækur og vera virkir gestir á síðunni þeirra :)

Slétt og brugðið

Ég hef aldrei verið mikið fyrir glingur, er voða ,,plain jane" þegar að skarti og klæðnaði kemur.
En þegar ég sá þessa skartgripalínu, Slétt og brugðið, hjá henni Fríðu á Strandgötunni í Hafnarfirði þá féll ég í stafi.
Ég fékk hring í jólagjöf frá eiginmanninum. Finnst þetta smart og ekki skemmir hvaðan áhrifin og munstrið kemur. Mig vantar eyrnalokkana.....hint hint Davíð minn!
Það er æðislegt að prjóna með svona á fingrunum, mæli með þessu - getið skoðað meira hér: http://www.fridaskart.is/slett/

dashjol-peysan

Eiginmaðurinn vill peysu. Hún á að vera brún, yrjótt og svona:

HG 2011

Garnið er komið í hús, súkkulaðibrúnn og bagehvítur plötulopi sem verður vafinn saman í hnykkla. Peysan verður prjónuð með prjónum nr 6 til að ná grófu stemmningunni.

Eiginmaðurinn hefur ekki fengið ,,signature-peysu" ennþá, veit ekki hvernig ég set hjól í munsturbekk sem kemur flott út. Er að vinna í þeirri hugmynd.

Stormtroopers - Star Wars

Ég á 8 ára frænda sem er Star Wars óður. Hann heitir Maggi.
Mér finnst hrikalega skemmtilegt að prjóna lopapeysur með einhverju sem einkennir viðkomandi og er hans uppáhalds. Hafði áður prjónað hauskúpupeysu á Magga en hún var að verða of lítil.
Ég brjálaðist því úr gleði þegar ég fann þessa síðu:
http://www.angelfire.com/space2/swcharts/knit.html
og þetta er niðurstaðan:

Ég get stolt sagt frá því að þessi sló svo sannarlega í gegn hjá mínum manni. Allir Star Wars aðdáendur eiga að eiga svona peysu, finnst ykkur það ekki? Ég fór á http://www.istex.is/ og fann uppskrift á 8 ára með tvöföldum plötulopa sem heitir Eik. Svo var lagt í að reikna. Ég var með úrtöku áður en munstrið hófst, á milli kallanna og svo í augunum svo strax aftur þegar kallarnir voru búnir og voilá - ekkert mál!

Næsta peysa á Magga verður hvít með Svarthöfða á :)